De Herr vo de Stei-Eiche

Yahualica de Gonzalez Gallo isch es Dorf im südliche Hochland vom Bundesstaat Jalisco, wo d'Heiligefigur vom Herr vo de Stei-Eiche vereehrt wird. De Herr vo de Stei-Eiche isch es Abbild vom krüzigte Jesus Chrischtus, welle dur eine im Buurehof Ocotes de Moya (g'hört zum Dorf Yahualica) asässigem Buur entdeckt worde isch. G'mäss de Legende isch de Buur en Alkoholiker gsi, het immer wieder sini Frau misshandlet und het d'Gwohnheit gha jede Sunntig is Dorf vo Yahualica z'gho um sich gho z'betrinke, e Musikgruppe az'huuere und dur d'Strosse zieh um mit überschwängliche Begeisterig z'schreie: „Es läbi d'Muetter Gottes !“ „Es läbi d'Muetter Gottes“.

Nachdem er sis Geld verprasst het, isch er uf sim Pferd z'rugg nach Ocotes g'ritte. Uf sim Rückweg het er jewils dur e Passage müesse ritte, wo dur e wuchtigi Stei-Eiche halbe versperrt gsi isch und eine vo de Escht het em jedes Mol sin Hut uf de Bode grüert. Nachdem ihm das vieli Mol passiert isch, het er eines Tages wüetend und gnervt en Axt g'holt und het ag'fange de läschtigi Ascht abz'hacke. Plötzlich isch Blut us em Ascht ussequolle, will er uf de Arm uf es im Ascht iiskizzierti Kruzifix g'schlage het. Verschrokke het er de Pfarrer vo Yahualica uufg'suecht, welle sofort a de Ort cho isch und feschtg'stellt het, das sich i dere Stei-Eiche s'Abbild vom krüzzigte Jesus Chrischtus befindet. De Pfarrer het en Bildhauer g'holt, wo das perfekti Abbild vom krüzzigte Jesus Chrischtus uss de Stei-Eiche uuseg'holt het. D'Legende seit, dass dem Abbild nur en Finger g'fehlt het, welle de Ascht gsi isch, wo de Buur ag'hackt het. Sitdem wird immer wieder versuecht de Finger az'mache, aber bis hüt fallt er immer wieder ab und will nie aklebe.

Die Legende wird mündlich vo Generation zu Generation überlieferet. A dem Ort, wo die Stei-Eiche g'stande isch, befindet sich hüt es Krüz uff Steine mit de Inschrift: „Das Krüz gedenkt dem Ort, wo mer de Herr vo de Stei-Eiche g'funde het. Zwüsche dene zwei Stei isch d'Stei-Eiche g'stande, wo mer s'skizzierti Abbild entdeckt het; im Johr 1747“.

Sit em Johr 1747 bis 1831 isch das Abbild nur i de Gegend vo Yahualica bekannt g'si. Alli Informatione het mer uf Grund vo schriftliche Beschriibige vo Persönlichkeite wie de Benito Torres und de Vicente Gomez R. überno.

D'Heiligefigur isch öffentlich g'nehmigt worde, nachdem de Pfarrer Jose Ma. Casillas uf Grund vo de Berüemtheit vo de erhaltene Gfalle durch de Herr vo de Stei-Eiche an jeni, wo ihn mit Glaube, Hoffnig und Hingab aabetet händ, emene Bildhauer de Uuftrag geh het, us dem Abbild e Figur mit Farbe z'forme. Am 22. November 1882 het de Pfarrer Jose Maria Rojas die g'schaffeni Heiligefigur vom Herr vo de Stei-Eiche mit Strahle rund um's Krüz g'schmückt.

 

DE ERSCHTI BSUECH VOM HERR VO DE STEI-EICHE IN YAHALICA JALISCO

  Me hat s'Johr 1833 gschriebe, wo de Pfarrer Cesareo Villegas d'Heiligefigur vo Ocotes de Moya inere Prozession vom chline Buurehof z'Fuess is Dorf Yahualica brocht het. Distanz zwüsche dene zwei Ort het öppe 19 Kilometer betreit. De Grund isch e Pescht gsi, d'Cholera Morbus, wo s'Dorf geisslet het und scho mehreri Lebe koschtet het. D'Mensche hend mit füürige Hoffnig Bittgebet uusg'sproche und mit dere Prozession vom Herr vo de Steieiche dur die wichtigschte Stroose vom Dorf, het Epidemie es End g'funde. Das isch am 27. September 1833 passiert und sit dem Johr bis zum hütige Ziitpunkt prozessiert die Heiligefigur jährlich a dem Datum durs d'Dorf Yahualica, wo vieli Schutzheiligifescht  zu Ehre vo de Figur vo uüsem Herr Jesus Chrischtus und andere religiöse Figure, welli au im Dorf verehrt werdet, abg'halte werdet.   Vo 1833 bis 1973 isch ie Original Heiligefigur jewiils is Dorf Yahualica b'rocht worde, bis  denn im Johr 1973 e Pilger Heiligefigur g'schnitzt worde isch, welli denn fiierlich jede 27. September in Yahualica iizieht und jewiils am Dunschtig vor Aeschermittwoch nach Ocotes de Moya zu de heilige Stett z'rückkehrt; die Tradition duuret a bis hüt. D'Original Heiligefigur ish i de heilige Stett von Ocotes de Moya. Früener isch die Heiligefigur inere chliine Chammere unterb'rocht gsi, aber am 19. Februar 1866 het mer Grundmuure g'leit für e formelli Chapelle und am 4. Februar 1868 het mer d'IIweihig zelebriert.   Es isch s'Johr 1956 gsi, wo de Pfarrer Jose Gonzales e g'rüümigi heilige Stett het welle baue und em Erzbischof Don Jose Garibi Rivera um die notwendige Bewilligungen bete het, welle den em Ingenieur Jose Luis Amezua das Projekt in Uuftrag geh het und am 9. Februar 1961 isch de erschti Grundstei g'leigt und g'segnet worde. Mit Hilf vo de Schpende vo de Gläubige het mer de Bau vo de heilige Stett verwirklicht, welli bis hüt in Ocotes de Moya exischtiert.   Sit 1954 bestooht die Tradition, dass mer am erschte September Suuntig d'Pilger vo de Stadt Guadalajara, Jalisco, welli d'Heiligefigur chömmet cho b'sueche, empfange werdet. Die Pilgerreis isch vo de Herre Donaciano Gomez Ruvalcaba (Chano) und Jose Gerado Velazco is s'Lebe g'ruefe worde.   D'Heiligefigur vom Herr vo de Stei-Eiche isch jetzt national und international für mehreri Wunder anerkennt worde, welli bi jene wo mit tüüfem Glaube um Hilf bete händ, vollbrocht worde sind Die Date vo dere Gschicht vom Herr vo de Stei-Eiche basieret vo de Veröffentlichig im Johr 1988 dur de Pfarrer Juan Francisco Navarro Gutierrez    

Esta traduccion fue realizada por el señor Herbert Auchli. Su tierra natal es Suiza y ha sido un peregrino en el mundo y, al leer la traducción alemana del Señor del Encino, por propia iniciativa realiza esta nueva traducción. Gracias mil por este hermoso detalle para con el Señor del Encino.